|
الكفتة المشوية طبق اللحمة الاقتصادي |
|
|
|
أجـمـد جـديـد -
أكــلات
|
|
Wednesday, 11 June 2008 |
طبعا كلنا كأسر مصرية واقعية لازم نلاقي حلول لمشكلة الارتفاع لاسعار المنتجات الغذائية رغم الجهود المضنية التي تبذلها الحكومة لم تسيطر عليها حتى الان و دة طبعا لان الموضوع كبير و عالمي و الكلام الكبير اللي بيتنشر في الجرايد
المهم اسهاما من موقع اجمد واحد في حل مشكلة من اكبر المشاكل العالمية نقدم لكم طبق الكفتة المشوية
المقادير:
1 كيلو لحم بقري مفروم
1 كيلو برغل او بقسماط مطحون
1/2 كيلو بصل
3 حزم بقدونس
ملح فلفل بهارات
"لو هتستعملي البقسماط يمكن تحتاجي ربع كباية لبن او بيضة"
الطريقة :
نقي البرغل و انقعية في ماية دافية بعدين هتنشلية من الماية و تعصرية منها كويس "لو هتستعملي البقسماط اضربية في الخلاط مع البيضة او اللبن"
دلوقتي قشري البصل و افرمية مع حزمتين بقدونس طبعا هتنقيهم و تغسليهم الاول ،و بعد كدة قلبي البصل مع الملح و الفلفل و البهارات و اضيفي اللحم المفروم و البرغل"او البقسماط"ممكن تقلبيهم كويس بس الافضل طبعا انك تفرميهم كمان مرة في الكبة .
المقادير دي كفاية لحوالي 70-80 صباع كفتة يعني 2-3 كيلو "اظن دلوقتي عرفتي ازاي الحاتي بيبيع كيلو الكفتة ب 30-40جنية"
ممكن تسويها على الفحم او في الفرن في صينية مدهونة سمن "علشان تاخد ريحة شوي الفحم ولعي فحمة و حطيها في ركن الصينية فلما تحرق دهن اللحم هتعمل ريحة تجيب اخر الشارع"
طبعا عملا بنظرية التوفير و الراحة هنشيل الباقي في الفريزر سواء كخليط او بعد ما تصبعيها و تكون جاهزة لعشاء سريع او لضيف مغاجئ او حتى تسندك لو رجعتي متاخرة من الشغل
في سؤال لكل ست بيت و طباخة حقيقية و هو حزمة البقدونس الثالثة لزمتها اية ؟لزمتها الذواق و الدلع تحت الكفتة في صينية التقديم ،على وش سلاطة الطحينة
مع طبق سلاطة خضراء بالبصل و الفجل "الهدف انك تعملي اكل برة في البيت بطعم برة ،فتوفري و في نفس الوقت تحببيهم في اكل البيت .دا غير فخرهم بيكي و باكلك اللي غلب المطاعم"
|
